एलायन्स प्लस टुले कक्षा १२ को बिद्यार्थीहरुलाई भब्य बिदाई कार्यक्रम गरेको छ

---

धनगढी, । धनगढीको एलाइन्स प्लस टु कलेजले कक्षा १२ का विद्यार्थीहरुको भव्य रुपमा विदाई तथा शुभकामना आदानप्रदान कार्यक्रम सम्पन्न गरेको छ। धनगढी उपमहानगरपालिका–२, शान्तोषी टोलमा रहेको कलेजले बिहीबार सितार होटलमा औपचारिक कार्यक्रमको आयोजना गर्दै परीक्षा तयारीमा रहेका विद्यार्थीहरुलाई शुभकामना सहित विदाई गरेको हो।

कक्षा ११ का विद्यार्थीहरुले आयोजना गरेको उक्त कार्यक्रमको सभापतित्व कक्षा ११ मा अध्ययनरत सिलास रानाले गरेका थिए। कार्यक्रममा प्रमुख अतिथि विद्यालयका सञ्चालक तथा प्रवन्ध निर्देशक उत्तम सिंह भण्डारी, विशिष्ट अतिथि प्लस टु कोअर्डिनेटर शेर सिंह धामी तथा शिक्षकहरुको विशेष उपस्थिति रहेको थियो।

कार्यक्रममा कक्षा ११ का विद्यार्थीहरुले कक्षा १२ का विद्यार्थीहरुलाइ मायाको चिनो प्रदान गर्दै उज्ज्वल भविष्यको शुभकामना व्यक्त गरेका थिए। भावनात्मक वातावरणमा सम्पन्न कार्यक्रममा विद्यार्थीहरुले विभिन्न सांगीतिक प्रस्तुति समेत प्रस्तुत गरेका थिए।

गत शैक्षिक सत्रमा कक्षा १२ को नतिजामा धनगढीका विद्यालयहरूमध्ये दोस्रो स्थानमा रहेको एलाइन्स प्लस टुले यस वर्ष पनि उत्कृष्ट नतिजा ल्याउने दृढ विश्वास व्यक्त गरिएको छ। कक्षा १२ का विद्यार्थीहरुले पनि कलेजको व्यवस्थापन, पठनपाठन र सहयोगी वातावरणको प्रशंसा गर्दै कृतज्ञता व्यक्त गरेका थिए।

कार्यक्रममा बोल्दै प्रमुख अतिथि भण्डारीले कक्षा ११ र १२ मा सिकेका सकारात्मक कुराहरुलाई आत्मसात गर्दै भविष्यमा पनि सफलताको यात्रा तय गर्न विद्यार्थीहरुलाई सुझाव दिएका थिए। उनले विद्यार्थीहरुलाई दुई वर्षको यात्रा अवधिमा भएका नमिठा घटनालाई बिर्सेर सकारात्मक सोच र व्यवहारको साथ अगाडि बढ्न प्रेरणा दिएका थिए।

यसरी भव्य रूपमा सम्पन्न कार्यक्रममा विद्यार्थी, शिक्षक, र अभिभावकहरुको उल्लेखनीय उपस्थिति रहेको थियो।