३२ जेष्ठ २०८२, शनिबार २०:२५
धनगढी – गौरव पाठशालाले जित्यो एलाइन्स प्लस टु पोष्ट एसईई फुट्सल उपाधि, उत्कृष्ट खेलाडीलाई छात्रवृत्तिको अवसर
धनगढी। एलाइन्स प्लस टुले आयोजना गरेको पहिलो पोष्ट एसईई फुट्सल प्रतियोगिताको उपाधि गौरव पाठशालाले जितेको छ। शनिबार सम्पन्न फाइनल खेलमा गौरव पाठशालाले साइमा एजुकेसनलाई पराजित गर्दै उपाधि हात पार्न सफल भएको हो।
विजेता गौरव पाठशालाले ट्रफीका साथै नगद २० हजार रुपैयाँ पुरस्कार प्राप्त गरेको छ। साथै, गौरव पाठशालाका सम्पूर्ण खेलाडीले एलाइन्स प्लस टुमा कक्षा ११ मा पूर्ण छात्रवृत्तिमा अध्ययन गर्ने अवसर पाएका छन्।
उपविजेता बनेको साइमा एजुकेसनले ट्रफीसँगै नगद १० हजार प्राप्त गरेको छ। साइमा एजुकेसनका खेलाडीले एलाइन्स प्लस टुमा ६० प्रतिशत छात्रवृत्तिको अवसर पाउनेछन्।
त्यस्तै, स्टार ब्रिज कोर्ष तृतीय स्थानमा रहँदै मेडलसहित नगद २५ सय रुपैयाँ पुरस्कार जित्न सफल भयो। स्टार ब्रिज कोर्षका खेलाडीले २५ प्रतिशत छात्रवृत्तिको सुविधा पाउने जनाइएको छ।
प्रतियोगितामा गौरव पाठशालाका आयुस बोहरा उत्कृष्ट गोलरक्षक, गोबिन्द बिष्ट सर्वाधिक गोलकर्ता र विशाल सिंह प्रतियोगिताका उत्कृष्ट खेलाडी घोषित भए।
धनगढीका १२ टिमको सहभागिता रहेको प्रतियोगिता “स्वास्थ्यका लागि खेल, राष्ट्रका लागि खेलाडी” भन्ने नाराका साथ आयोजना गरिएको थियो।
कार्यक्रमका प्रमुख अतिथि धनगढी उपमहानगरपालिका वडा नम्बर ४ का अध्यक्ष बुद्धि खड्काले प्रतियोगिताले सकारात्मक सन्देश दिएको बताए। उनले खेलका माध्यमबाट आर्थिक रुपमा कमजोर विद्यार्थीलाई छात्रवृत्तिको अवसर दिनु अत्यन्त सराहनीय कदम भएको भन्दै यस्ता प्रतियोगिता निरन्तर गरिनु पर्नेमा जोड दिए।
एलाइन्स प्लस टुका प्रबन्ध निर्देशक उत्तम सिंह भण्डारीले प्रतियोगिता सफल भएको जनाउँदै भविष्यमा पनि यस्ता कार्यक्रम आयोजना गरिने र प्रतिभावान खेलाडीलाई छात्रवृत्तिमा अध्ययन गराइने प्रतिवद्धता व्यक्त गरे।
एलाइन्स प्लस टु कलेजले कानुन, व्यवस्थापन, कम्प्युटर साइन्स र होटेल म्यानेजमेन्ट संकायमा अध्यापन गराउँदै आएको छ। कलेजले आगामी शैक्षिक सत्रदेखि सन्तोषी टोलस्थित पुरानो भवनबाट एसपीए कलेज नजिकैको श्रीपेच होटेल म्यानेजमेन्ट भवनमा स्थानान्तरण भई अत्याधुनिक सेवासहित कक्षा सञ्चालन गर्ने तयारी गरेको छ।
प्रतिकृया दिनुहोस्