कैलारी-७ का वडाअध्यक्षले चलाएको गाडीको ठक्करबाट महिलाको मृत्यु

---

जिल्ला कैलालीको कैलारी गाउँपालिका–१ स्थित हुलाकी राजमार्गमा मंगलबार दिउँसो सवारी दुर्घटना हुँदा एक महिलाको मृत्यु भएको छ भने चार जना घाइते भएका छन्।आज दिउँसो करिब ३:०० बजे कैलारी गाउँपालिका–७ बस्ने वर्ष ४० का दिपेन्द्र बम (वडा अध्यक्ष) ले चलाएको भे १ च ४२७५ नम्बरको महेन्द्रा कोरेक्स गाडी र विपरीत दिशातर्फ जाँदै गरेकी कैलारी गाउँपालिका–५ बस्ने वर्ष ३०/३५ की ईप्सा चौधरीले चलाएको से ५ प २७८२ नम्बरको मोटरसाइकल एकआपसमा ठोक्किँदा दुर्घटना भएको हो।

दुर्घटनामा मोटरसाइकल चालक ईप्सा चौधरीको टाउको र शरीरमा गम्भीर चोट लागेको थियो। उनलाई उपचारका लागि धनगढीस्थित नवजीवन अस्पताल पुर्‍याइएकोमा चिकित्सकले साँझ ४:२० बजे मृत घोषणा गरेका हुन्। मृतकको शव पोस्टमार्टमका लागि सेती प्रादेशिक अस्पतालको शवगृहमा राखिएको छ।
त्यस्तै, गाडी चालक दिपेन्द्र बमको मुखमा चोट लागेको छ भने अवस्था मध्यम रहेको जनाइएको छ। गाडीमा सवार कैलारी गाउँपालिका–७ बस्ने वर्ष ५० की तारा चौधरीको टाउको र बायाँ खुट्टामा गम्भीर चोट लागेको छ र नवजीवन अस्पतालमा उपचार भइरहेको छ। साथै, वर्ष ३४ का बलिराम चौधरीको शरीर र बायाँ हातमा चोट लागेको छ भने अवस्था मध्यम रहेको छ। वर्ष ३१ का कमलेस चौधरीको बायाँ खुट्टामा सामान्य चोट लागेको प्रहरीले जनाएको छ।

घटनाबारे जानकारी पाएलगत्तै इलाका प्रहरी कार्यालय हसुलियाबाट प्रहरी नायब निरीक्षक ऐन बहादुर पालको कमाण्डमा पाँच जनाको टोली खटिएको थियो। दुर्घटनामा संलग्न गाडी घटनास्थलमै रहेको छ भने मोटरसाइकल प्रहरीले नियन्त्रणमा लिएको छ। दुर्घटनास्थल इलाका प्रहरी कार्यालय हसुलियाबाट करिब ५०० मिटर पूर्वतर्फ पर्छ।
प्रहरीले घटनाको थप अनुसन्धान भइरहेको जनाएको छ।